Keshe, 17 qarashada QR Din isteri jáne azamattyq qoǵam mınıstri Nurlan Ermekbaevtyń qatysýymen oblys ákimdigi janyndaǵy úkimettik emes uıymdarmen ózara is-qımyl jáne yntymaqtastyq jóninde keńes otyrysy ótti, dep habarlaıdy Qamshy.kz aqparat agenttigi BQO İshki ister basqarmasyna silteme jasap.
Oblys ákimi Altaı Kólginovtiń tóraǵalyǵymen bolǵan jıynǵa ÚEU, saıası partıa, memlekettik qurylym ókilderi, aýdan ákimderi qatysty.
– Azamattyq qoǵamnyń rólin arttyrý – «100 naqty» qadam Ult Josparyndaǵy mańyzdy maqsattardyń biri. Elimizde azamattyq qoǵamnyń damýy úshin memlekettik qoldaý mehanızmderi naqtylandy. Iaǵnı áleýmettik-memlekettik tapsyrystar, granttar bólý, ÚEU-lardyń kásibıligin arttyrý, yntalandyrý baǵytynda kóptegen jumys atqaryldy. 650 myń turǵyny bar Aq Jaıyq óńirinde 645 ÚEU tirkelgen. Sonyń 100-den astamy belsendi qyzmet atqarýda. ÚEU-lardyń belsendiligin arttyrý máselesin birazdan beri kóterip kelemiz. Bıyldyń ózinde 800 mln. teńgege jýyq qarajat memlekettik-áleýmettik tapsyrys aıasynda bólindi. Bul qarjy qoǵamnyń ár túrli toptarynyń máselelerin sheshýge baǵyttaldy. Memleket basshysynyń «Rýhanı jańǵyrý» baǵdarlamasyn júzege asyrýǵa qoǵamdyq uıymdardyń memlekettik qurylymdarmen birlese jumys isteýiniń mańyzy zor. Ótken jyly bolǵan oblystyq ÚEU forýmynyń qorytyndysyna sáıkes azamattyq qoǵamdy damytý boıynsha keshendi is-sharalar qolǵa alyndy. Máselen, bıylǵy memlekettik-áleýmettik tapsyrys byltyrǵymen salystyrǵanda 30 paıyzǵa ósti. Byltyr tek tórt oblystyq basqarma áleýmettik tapsyrys negizinde qoǵamdyq birlestiktermen birigip jumys istese, aǵymdaǵy jyly olardyń qatary jetige jetti. Jalpy alǵanda, elimizdegi azamattyq qoǵamnyń damýyna batysqazaqstandyqtar da úlken úles qosýda, – dedi jıyndy ashqan Altaı Kólginov.
Sodan keıin sóz alǵan QR Din isteri jáne azamattyq qoǵam mınıstri Nurlan Ermekbaev: - Biz bıyldan bastap elimizdegi qarapaıym adamdardy tolǵandyratyn máseleler boıynsha monıtorıń júrgizýdi qolǵa aldyq. Úkimet basshysynyń qoldaýymen bastalǵan bul sharaǵa ÚEU-lar da belsendi qatysyp jatyr. Monıtorıń boıynsha qoǵamnyń túrli salalaryna qatysty jınaqtalǵan máseleler úkimetke usynylady. Odan ári tıisti mınıstrlikter men vedomstvolar olardy sheshýmen jumystanatyn bolady. ÚEU Premer-Mınıstrge ortalyq jáne jergilikti atqarýshy bıliktiń azamattyq qoǵam ókilderimen turaqty kezdesý kestesin bekitýdi usynǵan edi. Ol qoldaý tapty. Iaǵnı jylyna kem degende eki ret bılik qurylymdary ÚEU ókilderimen kezdesýleri kerek. Mine, bul mysaldardan-aq azamattyq qoǵamnyń bizde qanshalyqty alǵa basqanyn, olardyń bılikke yqpalyn kórýge bolady, - deı kele, ÚEU-lardy memlekettik qoldaýdyń jańa túrlerimen de tanystyryp ótti.
Oblystyq ishki saıasat basqarmasynyń basshysy Baqytjan Narymbetov óńirdegi azamattyq qoǵamdy damytý baǵytynda aǵymdaǵy jyly basqarmamen atqarylǵan is-sharalarǵa toqtalyp ótti. Ol ishki saıasat basqarmasynyń ÚEU jumystyń negizgi baǵyttary: ÚEU yntalandyrý jáne qoǵamdyq sharalarǵa tartý, otbasy qundylyqtaryn nasıhattaý, azamattardyń quqyqtyq sanasyn arttyrý, «Bolashaqqa baǵdar: Rýhanı jańǵyrý» baǵdarlamalyq maqalasyn júzege asyrý baǵyttary boıynsha jumystarǵa toqtaldy. Atap ótkendeı, oblysymyzda áleýmettik mańyzdy jobalar men ıdeıalardyń jármeńkesi uıymdastyrylyp, 10 úzdigi tańdap alyndy. Atyraý qalasynda ótken «ASAR» úsh jaqty yntymaqtastyq I respýblıkalyq forýmyna - «Qazaq sańyraýlar qoǵamy» oblystyq fılıalynyń «Estý qabileti buzylǵan jastar arasynda eńbek áleýetin damytý» jobasyn «AqsaıGazServıs» kompanıasy 2 mln. teńgege qarjylandyryp, memorandýmǵa qol qoıdy.
Oblysta «Bolashaqqa baǵdar: Rýhanı jańǵyrý» baǵdarlamalyq maqalasy aıasynda «Áleýmettik bastamalar kartasy» boıynsha qazirgi tańda 63 shara, 9 kishi joba júzege asyrylýda. Mesenattar qarajatyna 59 shara júzege asyryldy. Oblysymyzda quramynda 125 volonteri bar volonterler korpýsy jasaqtaldy. Qazirgi tańda volonterlerdiń jeke qabiletterin damytý baǵytynda jumystar júrgizilýde.
Oblysta ÚEU áleýetin arttyrý úshin 2018 jyly Azamattyq resýrstyq ortalyq (kovorkıng) ashylady. Ortalyq UEU men memlekettik organdardyń tyǵyz qarym-qatynasyna, olarǵa ádistemelik, konsýltatıvtik, komýnıkasıalyq, aqparattyq qoldaý kórsetýshi ortalyq bolmaq.
Ortalyq aýdandyq birlestiktermen jelilik jumysty uıymdastyrýǵa, ÚEU mektebin qalyptastyrýǵa, áleýmettik ıdeıalar jármeńkesi men jobalaryn, túrli konkýrstar men semınar-trenıngter uıymdastyrýǵa yqpal etpek.
